31 de dezembro de 2008

Rádio Krime, unha nova fenda no dial en A Coruña.

Na última edición no 2008 de Divertimento para pequenos monstros, en Rádio FilispiM 93.9 FM, despedimos o ano comentando algunhas novas referentes á actualidade das radios libres e comunitarias no estado español e no mundo:

O proxecto de normativa de radiodifusión elaborada polo Goberno Canario non contempla a concesión de frecuencias a radios que non sexan privadas e con ánimo de lucro, polo que as radios comunitarias fican fóra da convocatoria unha vez máis pese as recomendacións de AMARC (Asociación Mundial de Radios Libres e Comunitarias) y da propia Unión Europea quen na súa resolución do 25 de setembro de 2008 pedía o "recoñecemento legal aos medios de comunicación comunitarios (terceiro sector) como grupo definido, ao igual que se recoñece aos medios comerciais e públicos. A realidade en pleno século XXI no estado español deixa en evidencia o control do espéctro radioeléctrico por parte de intereses que semellan nada coincidentes cos da cidadanía: os intereses privados e políticos.

Ademáis nos fixemos eco do primeiro Foro de Radios, inscrito dentro do Foro Social Mundial que se celebrará en Belém do Pará (Brasil) entre o 27 de xaneiro e un de febreiro de 2009. O primeiro Foro de Radios será un espazo de articulación que integrará o traballo de radios comunitarias, libres, cidadás, independentes, alternativas e populares, redes e colectivos radiais, conformando un proxecto de intercambio na produzón de información libre en diversos formatos, ao través do uso estratéxico das novas tecnoloxías. O Foro de Radios, instalará os seus estudios no corazón do FSM 2009, dende donde realizará unha cobertura internacional en vivo cunha programación multilingüe compartillada, que se transmitirá ao través de internet (streaming). Os arquivos de audio da cobertura en vivo e as produzóns radiais (reportaxes e entrevista) estarán ao dispór de todas e todos os pequen@s monstros en www.foroderadios.org

Por último tivemos unha comunicación teléfonica co Centro Social Okupado As Atochas, no bairro de Monte Alto en A Coruña. Este "laboratorio social" cumprirá un ano, de incesante actividade, no mes de marzo de 2009. A súa experiencia de artellamento dun espazo donde desenvolver actividades de xeito autoxestionado e libre se une as éivas dunha okupación estudada canto ao valor especulativo do recinto elixido para acoller todo ilo. Dentre os colectivos que se teñen xestado na propia casa esta a xente de Rádio Krime, que andan a pór os alicerces precisos para okupar e dignificar as ondas coruñesas, como proxecto de comunicación libre, pese aos administradores do espectro radioeléctrico e os monaguillos de turno. Tes mais info do CS As Atochas neste sitio: http://aculturapreokupa.blogaliza.org


Podedes ouvir todos os contidos do derradeiro Divertimento para pequenos monstros do 2008, ao través deste reprodutor:
Descargar o arquivo


Ademáis, engadimos un video que resume como se okupou e encheu de vida o Centro Social Okupado, As Atochas en A Corunha. A okupar!



Fotos da entrada
: tiradas por membr@s asemblea do CS As Atochas durante o taller de radio impartido por Rádio Kalimera (Compostela).

28 de dezembro de 2008

Bon ano filispiniano 2009 !!!

En Rádio FilispiM, andamos a fechar un novo ano filispiniano. Mais, esta nova era na radio difusión local principiou hai cinco anos e vai sendo xa hora de que algún pequeno monstro se lanze a aventura de contar a súa historia.

Dentre as datas salientábeis, está ese oito de abril do ano 2004 (xoves "santo") no que se celebrou o primeiro festival Conspirando por unha radio libre, na estación de Ferrocarril de Ferrol, no que actuaron Miguel Alonso, Loom, Window Pane e a IV Guerra Mundial (todos eles grupos locais) e que supuso un importante espaldarazo económico para a consecución dos equipos técnicos que posibilitarían futuras emisións da primeira radio libre e comunitaria da nosa comarca.

Mais o proxecto botaba andar algúns meses atrás, concretamente a finais de 2003. Unha data especial foi o 20 de novembro de 2003, na que se celebrou a primeira asemblea dun proxecto que por entón era simplesmente unha ideia. Aquela primeira asemblea (da serie de previas á constituinte) celebrouse no local Manchita Cosa, que por entón comandaban Suso e Narsés. Aqueles meses o "Manchita" acollería algunhas das primieras e memorábeis actividades argalladas pra recadar fondos: unha estupenda cea vegana, algunha sesión de música e pinchas ou mesmo unha non menos resucitadora festa de defuntos.

Estas primeiras asembleas tamén se celebraron na Fundaçom Artábria que por entón tiña un estupendo (e añorado) local na Rúa Magdalena de Ferrol, e formanba parte dunha serie de reunións previas e preparatorias do que logo sería a primeira asemblea aberta constituinte do colectivo, celebrada no Ateneo Ferrolán o 28 de novembro de 2003. A importancia desta última asemblea é indiscutíbel para o que é a historia do colectivo Opaíí!-Rádio FilispiM. O texto que segue foi o que, por entón, se moveu masivamente entre tod@s para conseguir xuntar a cantos máis mellor:

Sent: Tuesday, November 11, 2003 11:02 AM
Subject: PRIMEIRA ASEMBLEA ABERTA PARA A CONSTITUCIÓN DUNHA RADIO LIBRE EN FERROL


Pola presente queremos anunciar a primeira convocatoria aberta para a constitución dunha asociación cultural que ampare o proxecto dunha RADIO LIBRE E COMUNITARIA no ámbito de Ferrol. Dita asemblea aberta, informativa e participativa, terá lugar o vindeiro venres 28 de novembro ás 20:00 horas no salón de actos do Ateneo Ferrolán. Nela trataránse, entre outras, as seguintes cuestións:
- Presentación do proxecto.
- Os fundamentos das rádio libres e comunitarias hoxendía. Exposición e debate deses principios no noso contexto.
- Constitución de comisións de traballo para unha primeira etapa (estatutos, divulgativa da idea, financiamento, técnica...)
- Participación activa e debate.


Outra data importante foi o sábado 13 de decembro de 2003, no que o aínda proxecto apresentouse públicamente no Foro Negro e participou nunha mesa de traballo xunto a Piratona, Kalimera e outros medios de contrainformazón do País galego. Todo esto levouse a cabo no Instituto Galego de Información en Compostela, como resposta de mobilización e artellamento de redes sociais, ante o panorama desolador (papel dos medios de des-información de masas e das institucións), por mor do desastre medio ambiental do verquido de fuel do buque Prestige as costas galegas.

E así, nese contexto, político social nace o Colectivo Opaii!-Rádio FilispiM. Todo isto é moi importante pra saber máis de nós, e pra que os que veñan detrás coñezan como e porque naceu todo isto.

Hai tempo que veño de darlle voltas á posibilidade de iniciar unha serie de entradas neste blog, sobre a historia do Colectivo Opaii-Rádio Filispim, no que profundar dende a distancia do tempo (con esa perspectiva) no traballo feito, as moitas anédotas, xente que pasou polo proxecto... todo claro, según o meu ponto de vista. Se vos presta esta idea, podedes fazer algún comentario a esta entrada. Material e gañas non faltan. O tempo xa é outra cousa, mais fariao de vagar.


De momento, só quero desexarvos a tod@s BON ANO FILISPINIANO 2009!!!. Estas afotos que seguen as tiramos o pasado sábado 27 de nadal, no local de Rádio FilispiM-Colectivo Opaii!, no Ateneo Ferrolán. Brindando polo novo ano filispiano estan o Cholo, a Fátima "Spanglish" e o Pequeno monstro. Ese brinde vai para tod@s vós tambén!!!




entrada en construzón

23 de dezembro de 2008

O Apalpador apareceu en Rádio Filispim.

O Apalpador é un vello xigante, de oficio carboeiro, que vive nas devesas das altas montañas. Na noite de Nadal baixaba ás aldeas para achegarse aos nenos e ás nenas que durmían. Caladiñamente, apalpáballes as barrigas para ver se os pícaros estaban ben alimentados. Logo de desexarlle que no ano vindeiro non pasasen máis fame, marchaba deixándolles unha boa presada de castañas quentes.

A tradición galega, recollida por José André Lôpez Goncález nas comarcas do Courel e do Cebreiro, reflicte a conexión desta figura con outras semellantes como o Olentzero, o Pai Inverno ou o propio Papá Noel. Crese que se trata dun costume de orixe pre-cristián que no seu momento debeu estar espallado por todo o país e que foi desaparecendo progresivamente.

O artista local Leandro Lamas realizou, en base aos dados recompilados sobre como podería ser a figura do carboeiro do Courel, a fermosa ilustración que acompaña esta entradiña.

Na edición do pasado martes 23 de dezembro de 2008, tivemos ao Apalpador en Divertimento para pequenos monstros, en exlcusiva mundial para @s ouvintes da Rádio Filispim, a rádio libre e comunitaria de Terra de Trasancos que emite dende Ferrol. Trouxo unha visión menos consumista e máis humana para estas festas.

Na web da Fundaçom Artábria veñen de fazer unha agarimosa referencia á presenza do Apalpador na Rádio Filispim, cunha chiscadela especial ao Divertimento e ao Pequeno monstro (muito obrigado amig@s!!!!). Podedela ver facendo click aquí.

Ogallá calle entre tod@s o intento de recuperazón desta figura senlleira de tradizón galega, que están a fazer colectivos coma a Gentalha do Pichel de Compostela ou a Fundaçom Artábria de Ferrol (Trasancos).

Podesdes ouvir o audio da entrevista ao Apalpador, en Rádio Filispim, ao través deste reprodutor:


A tod@s, pequenas e pequenos monstros, que de cando en vez seguides este blog, ouvides o programa de radio Divertimento, a tod@s @s meus compañeir@s da Rádio Filispim... que o Apalpador vos traiga este Natal unha boa presa de castañas ben quentes. De corazón, os meus mellores desexos para o vindeiro 2009.

O pequeno monstro.

Sorpresa!: se fas click no Apalpador terás un agasallo!

21 de dezembro de 2008

Roger de Flor, naturalidade silvestre.

Divertimento para pequenos monstros, o pasado 18 de decembro de 2008, entrevistou a Roger de Flor, o cabaleiro pop da Terra de Trasancos, Ferrol (Galiza).

Antes de apresentar en directo, o 26 de nadal no Ateneo Ferrolán, o seu segundo traballo titulado Naturalidad Silvestre, publicado no sello fenés Felipop Discos, pasou polo estudio de Rádio FilispiM, 93.9 FM pra nos falar do seu disco, de si mesmo e dos seus moitos amig@s.

Entre das dez cancións que están no estupendo segundo traballo discográfico de Roger, esta a peza Os dous amigos, da que a factoría Rubén Coca/Alberto Alonso, produciu este video-clip, no que participaron María López "Faltriqueira" (coros), Marina Molares (coros), o Marqués das Viñas( charango e coros), Nicolás Vidal (coros e harmónica), Jorge Juncal (acordeón), Serguei Izmailov (batería), Víctor Gacio (baixo) e o propio Roger de Flor (guitarra, mandolina e voz):



Ademáis, podes ouvir a entrevista que lle fixemos ao cabaleiro do pop trasanqués, Roger de Flor, no seguinte reprodutor:
Descargar o arquivo

Imaxe: portada do cedé Naturalidad Silvestre, de Roger de Flor.

15 de dezembro de 2008

Marca Branca, os Netlabels e Creative Commons da Rádio Zero (Lisboa) agora na Rádio FilispiM.

Marca Branca, programa da Rádio Zero dedicado exclusivamente a edições de netlabels e outros registos sonoros licenciados sob Creative Commons.

Así apresenta R
ute Correia a súa interesante proposta radiofónica que produce dende Rádio Zero (Lisboa), que dende xa mesmo pasa a emitirse tambén ao través da Rádio FilispiM, a libre e comunitaria da Terra de Trasancos que emite dende Ferrol (Galiza).

Recompilamos de seguindo algúns enlaces e outra información para que vaias coñecendo mellor a esta xentiña radioapaixoada da fermosa cidade de Lisboa, da que tanto gostamos os Pequen@s monstros:

Blogue do programa "Marca Branca" realizado na Rádio Zero por Rute Correia: http://www.programamarcabranca.blogspot.com/

Máis novas noutros blogues de Portugal: http://beatsplayfree.blogspot.com/

E na Galiza: http://commonsbaby.blogspot.com/ - http://opaii.blogspot.com

Nestoutro enlace tes unha pila de
afotos d@s colaboradores da Rádio Zero de Lisboa: http://www.flickr.com/photos/radiozero/

Un pouco de
história.
Rádio Zero
naceu no ano 2004. A súa filosofía está resumida neste Manifesto por eles asinado:
A rádio é um meio criativo que fomenta o experimentalismo e o desenvolvimento de obras de arte em formato sonoro. A rádio intervém na sociedade através de conteúdo de cariz comunitário e da promoção de actividades culturais. A rádio assume-se como um meio de acesso do indivíduo à radiodifusão. Sendo apologista da liberdade e criatividade, a rádio dá preferência total ao formato de autor.

Na Rádio Zero traballan de balde, sen outro interés que o amor á rádio libre e creativa, procuran colaboradores e se definen así:

Quem Som.
A Rádio Zero é uma secção autónoma da Associação dos Estudantes do Instituto Superior Técnico (AEIST), sem fins lucrativos e de duração ilimitada. Ambiciona contudo a ser muito mais que isto. Ser mais que um espaço físico, como tantos outros há, em que se transmite o que todos sabem que existe da forma que todos conhecem. A Rádio pretende ser um meio criativo que fomenta o experimentalismo e o desenvolvimento de obras de arte em formato sonoro. Sendo uma Rádio de cariz originalmente universitário, os seus objectivos passam naturalmente por: incentivar os estudantes para o fenómeno da radiodifusão e dar a formação radiofónica aos interessados em fazer rádio, possibilitando-lhes um espaço de criatividade; por contribuir para a formação cívica, cultural e científica dos estudantes e ouvintes através da divulgação informativa e artística; por fomentar a participação dos estudantes do IST na vida activa da escola e da Universidade. Ao longo de dois anos de emissão a Zero desenvolveu-se, tanto como instituição e números, como em maturidade radiofónica. Neste momento é um projecto em crescimento sólido e estruturado, com responsabilidades assumidas perante a comunidade radiofónica portuguesa e europeia. A Rádio Zero não se quer afirmar em alternância, mas sim em alternativa. Quer ocupar um espaço que sente existir, um hiato que clama por uma atitude descomplexada, por uma maneira diferente de estar e encarar a realidade radiofónica.

Rádio Zero, ademáis forma parte dunha rede: a Radia.

A Zero faz também parte da Radia, uma rede europeia de rádios experimentais/rádio arte. A concretizaçõo da rede deu-se em Fevereiro de 2005, e actualmente os parceiros são: Radio Campus-> Bruxelas, Bélgica - Radio Corax-> Halle (Saale), Alemanha - free103point9->Nova Iorque, EUA - Grenouille-> Marselha, França - Kanal 103->Skopje, Macedónia - Lemurie TAZ->Praga, República Checa - ORANGE 94.0-> Viena, Áustria - Resonance104.4fm->Londres, Reino Unido - Tilos Radio->Budapeste, Hungria - Radio Panik-> Bruxelas, Bélgica - Bootlab-> Berlim, Alemanha - SounDart Radio->Dartington, Reino Unido - InterSpace->Sófia, Bulgária - ORF Kunstradio->Viena, Áustria

Dende este pequeno blog, damos a benvida á Rute Correia e a propia Rádio Zero de Lisboa a Rádio Filispim!!!

11 de dezembro de 2008

Canto hai que aguantar a Roger de Flor!

Pero canto, canto hai que aguantar! Iso é o que di Rogelio Arias, máis coñecido por estas terras coma Roger de Flor, no recén tostado en forno da factoría Carlos Alberto Alonso, novo video-single promocional do seu flamante segundo cedé Naturalidad Silvestre.

No disco colabora un variado grupo de músicos e amigos da comarca, cuxos nomes vos soarán a todos os seguidores da estupenda música que se produce nestas terras ferrolás nos últimos tempos, coma Fran Rey (piano), Cabe García (guitarra), Luís Cuba (baixo), Álvaro Lamas (steal guitar), Serguei Izmailov( batería), etc.

Sempre rodeado de amig@s nos seus discos (e tamén nos videos!), agardemos tamén o estea o vindeiro venres 26 de nadal no salón de actos do Ateneo Ferrolán, R/Magdalena, 202, donde este cabaleiro pop da Terra de Trasancos, rebautizado coma Roge de Flor, apresentará o seu novo cedé
Naturalidad Silvestre.

Mais antes o tivémolo en entrevista no estudio de Rádio FilispiM, dentro do programa
Divertimento para pequenos monstros. Foi o xoves 18 de nadal de 2008 ás oito da tarde, dende o 93.9 da FM. Podes ouvir o audio íntegro da entrevista a Roger de Flor ao través do seguinte reprodutor:

O productor Carlos Alberto Alonso, comenta o que segue ao respeito do video que el mesmo realizou do tema que da título ao novo álbum:

Hai quen di que nunca debes laiarte dos tempos que che tocou vivir, pois de pouco te servirá. Pero sempre está esa excepción que confirma a regra, e aquí está Roger de Flor para demostralo. Nesta ocasión o bardo limodrés sofre unha insólita mutación, converténdose nun "impersonator" do Sinatra máis ratpackiano. Isto e moito máis nunhas imaxes que toman como decorado a noite ferrolá máis insospeitada, nun vídeo firmado co apoio loxístico de Ruben Coca Producións, que mestura á Nouvelle Vague cun Fred Astaire de mércores de mercadillo en Recimil.

Pequenas e pequenos monstros, con todos vós, o cabaleiro pop Roger de Flor:




Na foto superior: gravación dun video-clip nunha praia de Ferrol. Carlos Alberto Alonso á cámara e Roger de Flor de lado. Tirada do blog de Carlos Alberto Alonso.

9 de dezembro de 2008

Crónica da viaxe ao FMM de Sines, Portugal. 3ª parte: Ulía a menta.

Atrapados de novo na terceira e última parte da viaxe ao Festival de Músicas do Mundo de Sines, finais de xulho deste case anciá 2008.

A décima edición do FMM de Sines, a uns 160 quilómetros ao sul da Lisboa, foi unha virguería lusa canto a cualidade nas músicas, xeito de fazer, seriedade e profesionalidade.

De fazer unha comparanza cos festivais que há na Galiza, comezaría dicindo que o FMM de Sines non é un macro-botellón. A selección musical é variada, atrevida, o acceso de balde ou non, a cervexa Sagres ou Superbock o arroz caldoso e os cenarios para os concertos cinco: a vila de Porto Cobo, o Centro de Artes de Sines (dentro e fóra), o paseio da praia e o estupenda fortaleza: o Castelo.

Ademáis hai actividades paralelas: seminarios (A Barreira do Som: "Música, cultura e naçao"), exposicións ("Transurbana" de Luis Campos), Cinema ("Migraçoes"), conversas cos artistas e mesmo Ateliês para Crianças.

Canto ao detallismo, presente nos dez días que durou esta décima edición do FMM de Sines, nunca esquecerei que no concerto que deu o grupo paquistanés Faiz Ali Faiz, ulía a menta. Sim, a menta. Alguén da organización pensou que aquel cenario, plagado de músicas que nos levarían ao trance total, prestábase a espertar un sentido máis: o olfato. Na piso do Castelo. que andabamos a pisar, había ben espalladas frescas follas de menta. Non penso que volva a ulir nada igual en festivais (até a undécima edición do Sines, claro ;-).

De for pouco, a nova música galega estivo na pasada e edición do FMM de Sines. O primeiro día do festival, 17 de xulho, tocou Serra-lhe aí!! & Os Rosais, de balde no palco exterior do Centro de Artes de Sines.
Xa o 24 de xulho, no incomparábel marco do Castelo, quedándose co respectábel, tocou Marful co seu espectáculo "Salón de Baile". Na segunda das crónicas que fixemos deste festival (atoparala procurando neste blog), xa vos comentamos o que foi o que dixo Rádio Sines, radio oficial do evento, ao respeito.

Pequenas e pequenos monstros, no video que segue ovimos e vemos á Ugía Pedreira (cantante de Marful) nunha entrevista no propio festival, onde fala entre outras cousas que "criouse nunha taberna, entre homes":



De volta de Sines e Porto Cobo (duas vilas da mesma Freguesía), marchamos cara Lisboa, donde pasamos uns días estupendos. Como lugar de estancia eliximos Cascais, que fica a uns 30 minutos en tren da capital lusa. Moi recomendábel o parque de campismo de Cascais, dos mellores e máis tranquilos que teñamos durmido. Cecais, teña que ver o espírito tranquilo das moitas persoas que aló andan e que ou descansan ou surfear a "salvagem" praia do Guincho. Se tiver que por nota ao camping Orbitur Guincho esta seria un dez, canto a cualidade-prezo en comparanza con outros.

E con todas estas sensacións, aquel ulor a menta, aquelas músicas, aquel arroz, todos eses curmáns meus de Portugal... e a saborosa guinjinha! do largo de Säo Domingos que popularizou un galego na Lisboa chamado Espinheira. Siiiiiiii!!! a guinjinha, invento dun galego, a bebida máis populosa da Lisboa!!!. Non deixes de procurar eses pequenos dispensorios de guinjinha se vas pelos bairros senlleiros da Lisboa. Noooon!!!.

Logo de todo ilo, deixámosvos co último lote de afotos tiradas pelos monstros, esta vez na sempre fascinante Lisboa, mais tambén en
Cacais e Sintra. De todo veredes, até o sito onde dispensan ao camiñante con ese marabilloso brevaxe doce chamado guinjinha e que inventou un galego de Lisboa, pode que antepasado meu.



27 de novembro de 2008

II Xornadas do Comité Anti-Sida LAZOS.

O Comité Antisida LAZOS de Ferrol (Galiza), argalla estes días de fin de novembro de 2008, as súas II Xornadas de Sensibilización sobre o VIH-SIDA.

Estas Xornadas levan o lema "Ante o VIH a túa actitude marca a diferenza" e anteceden á celebración en todo o mundo do día contra a SIDA.

En Ferrol, as Xornadas terán lugar en diferentes espazos da cidade:
  • días 27 y 28 de noviembre, na Escola Universitaria de Enfermería e Podoloxía.
  • día 29 de noviembre, no Ateneo Ferrolán.
  • día 1 de nadal, na rúa Real.
Máis información en: comiteantisidaferrol@gmail.com

Pola nosa parte, o pasado 27 de novembro, dia no que comezaban as Xornadas, e no descorrer do programa de
Rádio FilispiM Divertimento para pequen@s monstros, mantivemos unha conexión con Carlos Varela, integrante de LAZOS. Podes ouvila no seguinte reproductor:

26 de novembro de 2008

Democracy Now! e Amy Goodman. 2º parte.

Seguindo con Amy Goodman, xornalista creadora e presentadora da canle independente Democracy Now!, lembramos unha situación que tivo que aturar en setembro de 2008 cando foi detida en Saint Paul, Minnesota durante a primeira xornada da Convención Nacional Republicana.

Amy Goodman, protestaba pola detención dos productores da súa canle, Sharif Abdel Kouddous e Nicole Salazar, cando apareceron varios axentes da policía armados até os dentes e leváronlla detida retorcéndolle o brazo.

Estes dous xornalistas da canle Democracy Now!, atopábanse cubrindo as manifestacións de protesta contra a reunión dos republicanos que debe proclamar oficialmente a John McCain, daquela candidato á presidencia dos EEUU.

Os axentes detivéronlles, segun o xerife do condado, por sospeitas de que estivesen "conspirando para organizar disturbios". O certo é que a Goodman leváronlla simplemente por tratar de defender aos seus colaboradores apelando á liberdade de prensa.

Tal e como comentamos nunha das entradas anteriores que podes atopar neste blog, Amy Goodman é unha das xornalistas máis coñecidas e respectada de Estados Unidos. e do mundo. Desde Democracy Now! cualificaron o arresto de ilegal e pediron a reporteiros e cidadáns que chamasen á oficina do alcalde da cidade e do xerif para protestar por esta acción. Finalmente os tres xornalistas foron liberados.

O certo é que ese día non só foron arrestados os xornalistas de Democracy Now!, senón que o foron 280 persoas. Podes ler clicando neste enlace, todos os diálogos -traducidos- que se produciron no momento da detención dos integrantes de Democracy Now! e, de seguido, ver o video que recolle o momento da detención polcial desta intrépida e exemplar xornalista.

Pra findar gostaría recomenda, ademáis do propio sitio oficial de Democracy Now! -> www.democracynow.org, un espazo habilitado por un veciño da comarca que teño achado recentemente na rede, e que vén ser un traballo de compilazón e traduzón dos seus contidos á lingua propia da Galiza: o galego. Podedes curiosear nel clicando neste enlace: Democracia Xa!
(www.democracia-xa.blogspot.com).

Un dos interesantes documentos que compila a enlace galaico made in Trasancos, Democracia Xa!, é o elaborado polo prestixioso xornal Le Monde Diplomatique e titulado: Democracy Now, voz da esquerda, e do que tedes acceso facendo clic no enlace.

Mada máis por hoxe, pequenas e pequenos monstros. A seguir conspirando!

Primeiro Foro Social Galego, do 5 ao 7 de decembro 2008.

QUE É O FORO SOCIAL GALEGO?

O Foro Social Galego (FSGal), que adopta a Carta de Principios do Foro Social Mundial, é un espazo aberto de debate democrático de ideas, de afondamento da reflexión, formulación de propostas, intercambio de experiencias e artellamento de movementos sociais, redes, ongs e outras organizacións da sociedade civil que se opoñen ao neoliberalismo e ao asoballamento das persoas fronte ao capital e que denuncian calquera forma de imperialismo.

O FSGal caracterízase pola súa pluralidade e diversidade, tendo un carácter non confesional, non gubernamental e non partidario. O FSGal non é unha entidade e non pretende ser unha instancia representativa da sociedade civil galega ou mundial.

QUE PRETENDE O FORO SOCIAL GALEGO?

O FSGal quere, tal como proclama o seu lema, Pensar e construir alternativas desde Galiza. Para iso, acolle como obxectivo acadar a confluencia e a visualización de alternativas á globalización neoliberal propostas desde un amplo abano de movementos sociais.

O FSGal quere situar a Galiza dentro da construción dese outro mundo, non só posible senón necesario. O FSGal quere debatir, achegar e formular preguntas. Pero tamén quere abrir camiños para transitar cara un mundo máis xusto, máis solidario, máis respectuoso coa diversidade.

Pero o FSGal quere ir máis aló da celebración dun evento. Quere ser un proceso permanente de debate e de construción de alternativas ao modelo neoliberal.

COMO SERÁ O FSGAL?

O Consello Dinamizador do FSGal, constituído o día 29 de marzo de 2008 en Santiago de Compostela por mandato dunha Asemblea de Movementos Sociais celebrada o 26 de xaneiro de 2008 na Facultade de Xeografía e Historia en Compostela, definiu 4 grandes eixos temáticos de análise, reflexión e debate, a través dos cales encadrar actividades e pensar e construir alternativas desde Galiza:

  1. Modelo económico e límites do crecemento
  2. Soberanía e diversidade fronte a uniformización e imperialismo
  3. Vida e Traballo
  4. Defensa das Liberdades e dos Dereitos Sociais

As diferentes actividades serán autoorganizadas e autoxestionadas polos movementos sociais galegos adheridos ao proceso.

A web do FSGal (http://www.forosocialgalego.org) será o portal onde se vaian comunicando as novidades ao respecto da celebración do FSGal: documentos para o debate; actividades formativas e informativas; etc.

O 5 de decembro haberá un acto de presentación pública do FSGal e no propio desenvolverase un acto de manifestación pública cuxa natureza aínda está por determinar.

ONDE E CANDO VAI SER O FSGAL?

O FSGal terá lugar en Santiago de Compostela entre os días 5, 6 e 7 de decembro de 2008, un mes antes da celebración do Foro Social Mundial que este ano terá lugar en Belém do Prá en Brasil.

COMO PODEMOS PARTICIPAR NO FSGAL?

Desde o Consello Dinamizador do FSGal artelláronse 4 formas de participación:

  1. Sendo membro integrante do Consello Dinamizador do FSGal
  2. Mediante a adhesión ao FSGal
  3. Participando como voluntario na organización do evento
  4. Simplemente, asistindo ás actividades que se ofrecerán no espazo libre de entrada.
Tamén podes participar achegando ideas, propostas, suxestións aos 4 eixos temáticos definidos máis enrriba no Foro de discusión do FSGal.

Pola nosa parte deixámosvos con dous audios que sintetizan todo o antedito.

O primeiro deles é unha cunha producida pola radio irmá da Coruña, CUAC FM, (que R.FilsipiM, completou con outros audios) e ,pra findar, unha entrevista tirada do programa de Rádio FilispiM, Divertimento para Pequen@s Monstros, que lle fixemos a Lupe Ces, integrante da Comisión organizadora do primeiro Foro Social Galego.



24 de novembro de 2008

Amy Goodman galardoada pola súa labor en Democracy Now!

A xornalista estadounidense Amy Goodman foi galardoada por fundar e conducir o programa de noticias de radio e TV Democracy Now! -Democracia Agora!-, co premio Right Livelihood 2008, coñecido tamén coma o Nóbel Alternativo e recibirá o premio no parlamento sueco en decembro de 2008.

Como sabedes, Rádio Filispim, 93.9 FM, inclúe nos
informativos da noite (de 22:00h. á 22:45) o audio en castelán desta outra visión da actualidade dende os propios EEUU.

O programa, Democracy Now!, é un exemplo dun formato innovador no xornalismo político e independente que leva á sociedade voces alternativas á corrente dominante nos medios, "voces que a miúdo son discriminadas", di a Fundación Right Livelihood na súa páxina en Internet.

O que segue é unha entrevista tirada do portal de internet DW-WORLD quen atopou á xornalista no seu departamento en Nova York.

DW-WORLD: Como influenciará este premio o seu traballo?

Amy Goodman: Estou tan emocionada, sinto que é unha gran honra para "Democracy Now!", porque chamará a atención sobre o que é o poder dos medios como forza para a paz e reforza un medio que constrúe pontes entre comunidades, no canto de ser o avogado de quen bombardean esas pontes.

Que é o que a motivou a iniciar Democracy Now!?

Comezamos "Democracy Now!" fai 13 anos no medio doutro ano electoral, en 1996. Agora estamos no 2008 e probablemente ante a máis importante elección da historia de Estados Unidos. A idea era facer escoitar aquelas voces de movementos de base, esa xente cuxas decisións pesan, non a un alto nivel pero os que se están organizando nas súas comunidades, os que son a verdadeira forza social en Estados Unidos e noutros países do mundo.

Nas súas transmisións de onte fixo vostede un comentario crítico sobre a crise financeira e sobre como os grandes bancos e as compañías financeiras necesitan ser rescatadas con diñeiro dos contribuíntes, cando estes non teñen nin voz nin voto nestas decisións, cal cre vostede que é a lección desta crise financeira?

A historia desta crise é a historia do rescate dos máis ricos de Estados Unidos por parte daqueles que non teñen diñeiro, a xente máis pobre, a xente que perdeu as súas casas pola crise inmobiliaria. É esta a xente que tería que ser rescatada, iso demostra quen ten o poder neste país, pero hai unha forza máis poderosa e é a que detentan todos aqueles que actúan unidos na defensa dunha sociedade máis xusta.

Como cre vostede que esta crise afecte as eleccións estadounidenses?

Ambos os candidatos chegaron a un mutuo acordo, ambos reciben millóns de dólares de Wall Street. Ambos teñen asesores que están profundamente inmersos nesta catástrofe global, son parte do motor. Desafortunadamente ningún diferénciase realmente do outro, así que non é unha verdadeira elección entre dous candidatos que ofrezan distintas alternativas para sacar adiante a economía.Que clase de consecuencias cre vostede que teña esta crise a longo prazo en Estados Unidos?

Aqueles que malgastaron millóns de dólares son os que son agora rescatados por xente que traballa duro en todo o país. Temos que botar unha mirada crítica ao noso sistema económico. Como é posible que as regulacións sexan feitas ao carón para que puidésemos chegar ao momento no que estamos agora?. Agora todo depende de como respondan os movementos sociais e a rúa a Wall Street.

O seu programa é traducido ao español e é escoitado de numerosos países en América Latina, en Estados Unidos e en Europa como se explica o éxito do seu programa?

A xente está famenta de voces independentes en todo o mundo. Estamos experimentando unha concentración dos medios en mans duns cantos magnates e a pesar de que hai miles de canles, hai cada vez menos variedade de opinións. Nese sentido "Democracy Now!" é única porque presenta esa gran diversidade de opinións que caracterizan a unha sociedade democrática no canto de ir a ese pequeno círculo que sabe tan pouco sobre moito, que lla pasa explicándonos o que pasa e confúndeno todo. Eu vexo aos medios como unha xigantesca mesa de cociña ao redor da que nos sentamos todos e discutimos as principais noticias do día. Guerra e paz, vida e morte, e se non pode ser así, iso é unha distorsión da sociedade democrática.Amy, hai algo que quixese vostede engadir?

Só me gustaría animar aos seus lectores a sintonizar "Democracy Now!".

Eva Usi
WORLD.DE

16 de novembro de 2008

Todo el Largo Verano: pop de salón.

Todo el Largo Verano, foi o grupo de música convidado o pasado xoves 13 de novembro de 2008 no programa Divertimento para pequenos Monstros, de Rádio FilispiM.

Este é un dos proxectos nos que anda embarcado Alberto Amigo, guitarra, letrista e tantas cousas máis de Todo el Largo Verano, quen estivo a conversar con nós, a pornos a súa música e agasallarnos con algunha peza pop en exclusiva, recén saída do seu salón.

Do salón? Así é, pois o Fer, Rubén, Carolina e outros que pasan pop alí, constrúen e gravan as súas pezas no salón da casa de Alberto. Guitarras, batería, teclados, ukeles e outros artefactos, son pulsados por estes activistas do pop ferrolán.

Algúns deles, por se fora poco, andan embarcados en proxectos paralelos, coma a formación Quant, ademáis de dar vida a ese proxecto interestelar coñecido coma La Fonográfica General, que (por certo) remata de cumprir este outono tres anos.

Rubén Coca, o cineasta ferrolán que estes días anda a gravar a curtametraxe de animación A cegona pedichona baseada nun relato de Lucía Etxebarría, é un deses que se pasan polo salón do Alberto para, entre outras, obsequiar a Todo el Largo Verano, con video-clips como o que segue.




Pra findar, deixámosvos cun audio no que podedes ouvir íntegra a conversa que o pasado Divertimento tivo o Pequeno monstro co Alberto Amigo. O tipo co salón máis monstroso que teña pasado por este blog.

11 de novembro de 2008

Rádio FilispiM, apresenta a súa cuarta tempada nas ondas.

O pasado sábado 8 de novembro de 2008, o Colectivo Opaíí! - Rádio FilispiM, apresentou no Ateneo Ferrolán a súa cuarta temporada nas ondas, no descorrer dunha nova Sesión Vermú (a quinta!).

Atrás fica aquel verán de 2004 no que comezaron as emisións os da Filispina, logo de duros meses de traballo e algún que outro Conspirando polo medio. "Divertimento para pequenos monstros", atopaba daquela, por fin, o seu sitio natural ao incorporarse a grella da radio libre e comunitária de Ferrol e Terra de Trasancos, logo de ter cabalgado polas ondas da comarca (Radio Fene, Radio Kaos), durante 20 anos. Algún día vos contaremos esa historia...

Para tod@s aqueles que non sintonizáchedes con Filispim, pasámosvos un enlace ao audio íntegro (case 3 horas) do programa especial, realizado dende o set de radio instalado para a ocasión no baixo do Ateneo, coa asistencia técnica dun filispino mutante no estudio central. Ademáis, tendes unhas afotos tiradas pola Spanglish Fátima, que ilustran o acontecido na festa.

O PROGRAMA DE RADIO ESPECIAL tivo este GUIÓN:

1º Presentación da sesión vermú.

2º Presentación da grella da cuarta tempada de Rádio FilispiM (1ª parte):
  • SPANGLISH
  • VAMOS ANDAR
  • ATENEA
  • CONTRA-INFORMATIVOS
3º Actuación do grupo folk de Ferrol "ALEN DE ANCOS".

4º Presentación da grella de Rádio FilispiM (2ª parte):
  • O RECUNCHO
  • AFRICANÍA
  • DIVERTIMENTO PARA PEQUENOS MONSTROS
  • CRESTA E IMPERDIBLES
  • MOITO DE AQUÍ
  • MAPAMUNDI
  • DISCONTINUIDADE
  • NOSOTRAS EN EL MUNDO
  • CUBAINFORMACIÓN
  • RADIO INSURGENTE
  • HORAS MUSICAIS
Escoita aquí, ou Descarga, o programa especial da V Sesión Vermú do Colectivo Opaíí! - Rádio Filispim, 93.9 FM.


6 de novembro de 2008

A radio comunitaria Arxentina FM La Tribu, premiada pola produzón "O corpo son eu".

FM La Tribu é unha radio comunitaria estabelecida en Bos Aires, Arxentina, coma un proxecto colectivo para que o cotiá poida transformar os costumes. Ese costume, a do consumo, a da indiferenza, a da representación, a do espectáculo. Ese costume diario que colaboura coa reprodución. La Tribu é parte das redes creadas polo desexo de construír outros xeitos de vivir.

A radio é unha conversación. Son que se propón relatar a época sen convertela en estatística. O esforzo por evitar o ruído da información que non produce máis que un silencio inmóbil. A radio é a música da resistencia. A radio é imaxinación. A imaxinación é poder.

Como a comunicación non é unha técnica, as ferramentas constrúenas as prácticas. Talleres e encontros para facer os medios de comunicación que desexamos. Para imaxinar unha linguaxe ou fortalecer unha organización. Para multiplicar emisores.

FM La Tribu é integrante de AMARC - Asociación Mundial de Radios Comunitarias- e de ALER -Asociación Latinoamericana de Educación Radiofónica-.

FM La Tribu foros premiad@s recentemente polos organizadores dos Media Awards "Every Human Has Rights", polo traballo radiofónico titulado "O corpo son eu". Unha produzón radial que aborda a problemática do tráfico de mulleres para a explotación sexual na República Arxentina.

O traballo foi seleccionada xunto a outras 30 realizacións gráficas, radiofónicas, audiovisuais e de soporte web, entre 482 traballos recibidos de 108 países.

Media Awards "Every Human Has Rights" é un premio público que sucede no marco do 60 aniversario da Declaración Universal dos Dereitos Humanos.

Os resultados oficiais dos premios foi anunciado logo de decisión dun xurado independente internacional e polo voto do público. O 6 de decembro de 2008 terá lugar o acto da entrega de premios en París.

Podes escoitar a galardonada produzón "O corpo son eu", de FM La Tribu, pulsando o play deste reprodutor:

5 de novembro de 2008

Radio comunitaria arxentina clausurada por denunciar contaminación.

A Comisión Nacional de Comunicacións (CNC) e a Policía Federal Arxentina secuestraron os equipos de FM Punto Cero, da localidade de Alberti, provincia de Bos Aires. A radio comunitaria andaba a denunciar a contaminación ambiental no lugar.
A orde de violación da morada foi ditada por un Xuiz federal da localidade bonaerense de Mercés, e executada poucas horas despois pola CNC e a policía. Os responsábeis da emisora aseguraron que se trata dunha "xogada política" das autoridades do municipio e a provincia, que foron denunciadas en antena como responsábeis da contaminación na rexión.

FM Punto Cero tiña sido a única emisora que transmitía en directo as sesións do Consello Deliberante da localidade e desenvolvera investigacións sobre os negocios dos funcionarios públicos.

A radio denunciou a "desidia dos gobernantes locais en materia de medio ambiente" a través dun material xornalístico sobre o vertedoiro ao descuberto e a pranta depuradora de refugallos cloacales que desemboca sen tratamento sobre o río da zona, o Río Salgado.

Tamén a radio falou da contaminación provocada por derrámelos de fertilizante da firma Rifara e a complicidade dos funcionarios.

Os responsábeis da radio, apresentaron unha medida cautelar ante o xuíz con 121 sinaturas de veciños da pequena localidade bonaerense para denunciar a persecución á independencia e a liberdade de información e expresión desta radio comunitaria.





Reporte e audio publicado pola rede Más Voces (URCM) : www.masvoces.org
Traduzón: Pequeno Monstro

24 de outubro de 2008

O Parlamento europeo vén de recoñecer a laboura dos medios de comunicación comunitarios.

O Parlamento europeo vén de recoñecer o aporte dos medios comunitarios e pide recoñecemento legal e medidas de apoio para o terceiro sector da comunicación.

Trátase da primeira resolución da Unión Europea que se adica específicamente aos medios comunitarios.

A resolución do Parlamento Europeo non é vinculante pero é un importante apoio para os medios comunitarios xa que a Resolución recoñece a labor que desempeñan estes medios e o seu aporte á pluralidade e por outra banda pide aos Estados da UE, o seu recoñecemento legal e medidas de apoio.

Esta resolución é de especial importancia en diversos países da UE ou en proceso de incorporación donde non se recoñece legalmente aos medios comunitarios e se dificulta o seu acceso ao espectro radioeléctrico (países da Europa do Este, ou mesmo o caso do Estado español).

O contido da resolución sinala que os medios comunitarios (denominados coma "terceiro sector da comunicación") son un medio eficaz de fortalecimento da diversidade cultural e lingüística, a inclusión social e a identidade local, promoven o diálogo intercultural, contribúen a acadar o obxectivo de mellorar a alfabetización mediática dos cidadáns mediante a súa participación directa na creación e a difusión de contidos, contribúen a reforzar o pluralismo dos medios de comunicación e fomentar a participación ciudadá no discurso público.

O Parlamento Europeo pide á Comisión e aos Estados membros que teñan en conta a Resolución á hora de definir nas súas normativas os medios do terceiro sector coma medios sen ánimo de lucro, responsábeis ante a comunidade e abertos á participación da comunidade.

Ademáis recomenda aos Estados membros que dean reconoñecemento legal aos medios do terceiro sector da comunicación (TSC) que apoien máis activamente estos medios e que "poñan ao dispor o espectro de frecuencias, analóxica e dixital, de radio y televisión, tendo en conta que o servizo prestado polos medios do terceiro sector da comunicación (TSC) non se van evaluar en termos de custe de oportunidade ou xustificación do custe de adxudicación do espectro, senón polo valor social que representa".

*Organismos europeos cada vez máis interesados nas políticas de comunicación dos estados membros*
A problemática dos medios comunitarios e as posibilidades que oferecen, comezan a estar na axenda dos organismos internacionais. Durante 2007, a Comisión de Cultura e Educación do Parlamento Europeo, encargou un estudo sobre o Estado dos Medios Comunitarios na Unión Europea.

Tamén está tendo a repercusión a Declaración conxunta sobre a diversidade na radiodifusión adoptada o 12 de decembro de 2007 polos Relatores da Liberdade de Expresión. Pola súa banda o Consello de Europa remata de publicar un informe sobre o Rol dos medios comunitarios na promoción da cohesión social.

Otros temas que estar a suscitar interés nos organismos internacionais son: en los organismos internacionales son:
- Pluralidad y diversidad de medios.
Tanto o Consello de Europa coma a Comisión Europea (UE) veñen de realizar estudio
s recollendo a situación nos Estados membros.

Ademáis o Parlamento Europeo aprobou recentemente unha Resolución sobre a concentración e o pluralismo dos medios de comunicación na Unión Europea. En concreto a 2007/2253(INI))
- Organismos independientes do audiovisual.
A Directiva de Servizos Audiovisuais obriga a todos os estados
membros a contar (antes de 2010) cunha Autoridade independente que se encargue de velar polos contidos televisivos. O Consello de Europa ven de emitir diversas Recomendacions e Declacións chamando aos Estados a contar con organismos independientes.






Nota: información facilitada por AMARC-Europa (Asociación de Radios Comunitarias-Europa.) Traduzón Pequeno monstro. Audio: rede Más Voces

22 de outubro de 2008

I Congreso Europeo de Mulleres e Radios Comunitarias.

A pasada fin de semán estivo protagonizada polo movimento das mulleres. Se en Vigo a Marcha Mundial das Mulleres convocaba as mulleres máis activas de todo o planeta, en Madrid, o Centro Cultural Conde Duque, acollía o I Congreso Europeo de Mulleres en Radios Comunitarias.

A cita non só estaba programada para as radialistas, senón que bastaba con ter interese en temas de xénero e comunicación. As compañeiras radialistas de Radio Vallekas, e o conxunto das mulleres integradas na URCM (Unión de Radios Libres e Comunitarias de Madrid), desenvolveron o traballo de organización, ademáis das compañeiras do programa de radio Nosotras en el Mundo que, por certo, podedes ouvir en Rádio FilispiM, coma un dos programas de produzón allea, que a libre da Terra de Trasancos redifunde.
Máis de 70 comunicadoras e periodistas de radios comunitarias da Irlanda, Franza, Suecia, Austria, Italia, Suiza, Alemaña e o Estado español, así coma organizacións de mujeres, xuntáronse en Madrid no primeiro Congreso Europeo de Mulleres en Radios Comunitarias.
Foi un encontro sen precedentes na Europa, cuxo obxectivo foi o intercambio de experiencias de comunicación, debater e analisar como as radios comunitarias poden potenciar xunto coas organizacions e movimentos de mulleres, a súa incidencia política e social no contexto local, estatal e global ao través de modelos de comunicación non sexista.
Un especial tempo de reflexión estivo adicado ao "Dereito á Comunicación" coma unha ferramienta para a igualdade e o contexto lexislativo no que se atopen as radios comunitarias, dende un punto de vista de xénero.

As políticas de xénero; a incidencia política das voces das mulleres mulleres; a radio comunitaria coma ferramienta de empoderamiento e a construcción de pontes de comunicacións coas mulleres do mundo, foron outros dos eixos temáticos dese congreso.
Entre as expertas que interviron coma ponentes estacamos a Sally Burch, directora executiva da Axencia Latinoamericana de Información (ALAI), especialista no tema de comunicación e novas tecnoloxías; Lourdes Muñoz de Santa María, deputada do grupo socialista, portavoz da Comisión de Sociedade da Información e vogal da Comisión de Igualdade; Geneviève Teyssier, Vicepresidenta do Sindicato Nacional Francés de Radios Libres, Begoña San José, Secretaria do Forum de Política Feminista no Estado español e Margaretta D'Arcy, dramaturga e pacifista irlandesa fundadora de Radio Pirate Woman.

Esto é todo pequen@s monstr@s. Ficades cun audio producido pola rede Mas Voces, coa análise e balanzo final do Congreso. Por certo, os reportes de Más Voces podédelos escoitar diariamente nos contrainformativos que tres veces ao día emite Rádio FilispiM, 93.9 FM en Ferrol (Galiza).


Hala! monstros, a pinchar a outro lado!
Related Posts Plugin for WordPress, Blogger...